Fundjava pritet të jetë nën ndikimin e kushteve të paqëndrueshme atmosferike, me reshje shiu dhe momente të shkurtra përmirësimi. Ditën e diel, në disa rajone të vendit, parashikohen edhe stuhi lokale.
Meteorologia e Shërbimit Meteorologjik Ushtarak, Eneida Doçi, bëri të ditur se vendi ynë do të ndikohet nga masa ajri të lagështa me origjinë perëndimore, të cilat do të sjellin ndryshime të ndjeshme në mot gjatë ditëve në vijim.
“Masat ajrore me lagështi që vijnë nga perëndimi do të ndikojnë në territorin tonë gjatë gjithë fundjavës. Moti do të karakterizohet nga alternime vranësirash mesatare deri të dendura, veçanërisht në zonat lindore, por nuk do të mungojnë periudha të shkurtra me kthjellime, kryesisht në ultësirën perëndimore,” – shpjegoi Doçi.
Sipas saj, dita e shtunë do të sjellë reshje lokale me intensitet të ulët, më të pranishme në orët e paradites. Pasdite parashikohet një përmirësim i përkohshëm i kushteve atmosferike.
Ndërsa e diela do të rikthejë reshjet, të cilat pritet të jenë më të dukshme në zonat veriperëndimore dhe ato qendrore. Në këto rajone mund të zhvillohen edhe stuhi të shkurtra shiu, të shoqëruara me shkarkesa elektrike.
E hëna do të vijojë me paqëndrueshmëri, kryesisht në orët e para të ditës, ndërsa e marta pritet të ketë reshje të herëpashershme, me intensitet të ulët dhe karakter lokal.
Meteorologët u bëjnë apel qytetarëve që të tregohen të kujdesshëm gjatë udhëtimeve në fundjavë, veçanërisht në zonat malore dhe bregdetare, ku mund të shfaqen stuhi më të forta dhe rrëshqitje të përkohshme të terrenit për shkak të reshjeve.